البرياني على الطريقة العراقية

البرياني على الطريقة العراقية




استناداً الى طلب الاخت
Dream Girl
قررنا نشر

البرياني على الطريقة العراقيه

وحسب ما علمتني اياه احدى الاخوات جزاها الله خير الجزاء
وذلك بعد ان ضقنا مرارة الغربة
بدئنا نسأل عن طريقة عمل الاكلات

وان شاء الله اتكون الطريق واضحة



اقتباس:
المشاركة الأصلية كتـــبها dream girl




مشكووووووووور أخوي عالرد بس لو تكرمت ممكن تعطينا مقادير البرياني العراقي مع طريقته عشان الكل يستفيد إن شاء الله وتعالى





واليكم المفاجئه
ها هو ذا

البرياني

المقادير
3 كوب رز
دجاجة متوسطة الحجم
بطاطة والكمية حسب الرغبة وليكن كيلو
لوز مقدار كوب
كشمش (يعني زبيب بدون نوى)نص كوب
اربع او خمس جزرات
ملعقتان غير مملوءتان تماما اكل بهارات البرياني وهاي تجيبها من يم العطار او باي سوبر ماركت اذا موجودة
بزاليا

طريقة التحضير
بسم الله نبدأ حتى تصير بيه بركة
تغسل الدجاجة وتقطع قطع متوسطة وتوضع في قدر لغرض سلقها وتضاف اليه ملعقة اكل ملح اضافة الى عود دارسين وحبتان هيل اذا عندك اذا ماكو مو مشكلة
تجيب الجزرات وتقطعها قطع بقدر حبات اللوز وتضاف الى الدجاج وتتركها تسلق معا
في هذه الاثناء تجيب البطاطة وتقشرها وتغسلها وبعدين تجي وتقطعها اصابع بس مو طويلة كلش ولا سميكة او خفيفة كلش

تجيب كوب اللوز اذا بعده بقشره ميخالف تجيب ماعون تكدر تخليه على النار وتخلي اللوز بيه وتضيف الها ماي وتخلي على النار الى ان تبدي تغلي
شراح تسوي؟؟؟
اني اكَلك تطفي الطباخ وتخليه الى ان يبرد
بهاي الاثناء تبدي تكَلي البطاطة بس مو تحترك او يكون لونها اصفر ما مستويه لا
شوكت ما شفت لونها صار ذهبي مشهي
ممممممممممم
ترفعها وتخليه بمصفاة حتى الدهن مالته يتصفى وبعد ما تخلص من البطاطة تجيب اللوز الي اكيد نزعت منه قشوره تكليها بس دير بالك مو على نار قوية وانما متوسطة الى هادئه حتى تصير مقرمشة
ولونها مائل للبني شويه يعني مو هوايه لان اللوز المحترك هم ما طيب
بعدين تضيف الكشمش للمقلاية
وراسا تطفي الطباخ وتشيلها لان هذا كلش نازك ويحترك والمحترك مو طيب ابدا ولا منظره حلو
ها وين وصلنا
هسه الدجاج بعده ما مستوي لو استواه ؟؟؟
اوك انتهينا من القلي واكيد هسه الدجاج مستوي
شيل قطع الدجاج على صفحة والجزر على صفحة اخرى وعيدان الدارسين وحبات الهيل ذبها بعد ما نريدها
واحتفظ بالماي دير بالك الماي هذا نريده كلش مهم
عندك 3 اكواب تمن
صح اوك
جيبها وخلي بماعون واغسله

جيب ما مقداره 3 ملاعق اكل دهن
ولو انه احنا نستعمل زيت سواء للقلي او للطبخ
المهم
جيب شعرية اذا عندك وخليها ويه الدهن بس هاي كلها وين بجدر
الي راح تطبخ بيه التمن ودير بالك حجم الجدر يكون مناسب لانك راح تضيف المقليات الها ها
اوك
دير بالك لون الشعريه شويه ينطي على احمر مو هوايه
اي وهسه جيب 3 اكواب الى اربعة من ماي الدجاج وصبها على الزيت والشعرية دير بالك مرات البخار يكون ضرره اكثر من النار نفسها شويه شويه حتى تمتص الحرارة ومتأذيك
ها اذا ماي السلق مالت الدجاج ما كفتك مو مشكلة كمل الناقص من الماي العادي بس يكون مغلي
تضيف للجدر البهارات مالتك
من يبدي يغلي الماي تصفي الرز وتضيفه للجدر وتخلي القبغ على الجدر وتنتظرلك فد ربع ساعة الجدر يكون على نار شوية قوية وقبل ما ينشف الماي من التمن تهدي النار وتخلط وترجع تخلي القبغ مكانه وتنتظرلك ربع ساعة لخ وبهاي الاثناء شنو راح تكعد
لا
جيب الدجاج مالتك وانزع منه العظم وفتته بس مو شعيرات لا ترى بالعين المجردة
وتجيب مقلايه وتخلي بيها مسحة زغيره زيت وتحمص الدجاج شويه وتخلط ويا باقي المقليات
وبعد انتهاء الربع الساعة الثانية تجيب المقليات مالتك وتخلطها زين ويا التمن وبعدين تخليها فد ربع ساعة اخيرة على النار الهادئة
وبهاي الفترة تكون
حضرت السفرة والزلطة اذا تريد
وبالف عافية
ويارب
اكون كَدرت اعلمكم شلون تسوها وما تغلطون بيها وتطلع طيبة

ملاحظة
بالامكان اضافة ربع كوب صنوبر الى الخليط بعد قليها طبعا والبزاليا ايضا